Cənub marşrutu: Astara

Rayonun əhalisi - 88500 nəfər; rayon mərkəzi, Astara şəhəri - 14800 nəfər.

ASTARA RAYONU Azərbaycanın cənub-şərqində, İranla sərhəddə yerləşir. Rayon ərazisinin bir hissəsini Talış dağları, digər hissəsini isə ovalıq tutur, bu da regionun iqlim özünəməxsusluğunu şərtləndirib.

Meşələr 37000 ha ərazini tutur, ASTARAÇAY və TƏNGƏRUD çayları Talış dağlarının yüksəkliklərində başlayır və Xəzər dənizinə tökülür. Flora zəngin və müxtəlifdir - yabanı heyva, əzgil, yemişan, böyürtkən, ipək akasiya, həmişəyaşıl bizovnik, sarmaşıqlar fəsiləsinin nümayəndələri. Burada suda batan məşhur dəmirağac (DƏMİR AĞAC) da bitir. Ondan burada qədim zamanlardan yerli sakinlər toxuculuq dəzgahları, müasir dövrdə isə toxuculuq sənayesi dəzgahları üçün hissələr hazırlayıblar.

Fauna floradan az müxtəlif deyil: oxlu kirpilər, cüyürlər, canavarlar, vaşaqlar, maral və s. heyvanlar yerli meşələrdə sərbəst yaşayır. Xəzər dənizinin sahili təmiz, şəffaf sulu qumlu çimərliklərlə zəngindir.

Rayon ərazisində Hirkan Milli Parkının bir hissəsi yerləşir, bu da buraları ekoturizm üçün cəlbedici edir. Astara rayonunda, İranla sərhəd yaxınlığında, İSTİSU adlanan yerdə müalicəvi mineral bulaqlar çağlayır. Rayonda çayçılıq, tərəvəzçilik inkişaf edib, sitrus meyvələri yetişdirilir.

Rayon ərazisində çoxlu sayda tarixi-memarlıq abidələri (400-ə yaxın) var. Demək olar ki, hər kənd insanların burada qədim zamanlardan yaşadığını sübut edən izləri qoruyur. Məsələn, ŞİNDAN kəndində xalq arasında BABƏK QALASI adlanan QALA; NÜDİS kəndində QALA; PENSƏR kəndində MƏŞƏDİ ƏBÜTALIB hamamı, HACI TEYMUR və HACI CAHAN BƏXIŞ məscidləri; ŞAHAĞAC kəndində türbə; ARÇIVAN kəndində KƏRBƏLAYI HƏMİD ABDULLA hamamı, burada həmçinin yanan kibriti yaxınlaşdırdıqda suyu alışan məşhur kükürdlü bulaq yerləşir; QAPIÇIMAHALLƏ kəndində qala xarabalıqları, türbə, 7-ci əsrə aid karvansara, daş və tunc dövrlərinə aid daş heykəllər. SİNİYAPERT, LOMİN, PİLƏKƏN kəndlərində 13-cü əsrə aid KÖRPÜLƏR.

ASTARA ŞƏHƏRİ - Astara rayonunun inzibati mərkəzidir. Bakıdan məsafə - 322 km. Şəhər Bakı-Tehran yolunda mühüm tranzit məntəqəsidir.

Astara bir tərəfdən dəniz, digər tərəfdən Talış dağları ilə əhatələnmiş sərhəd şəhərciyidir. Şəhərin ətrafında çəltik sahələri var, balıqçılıq inkişaf edib, - bu da yerli milli mətbəxin xüsusiyyətlərinə təsir etməyə bilməzdi.

Astarada kifayət qədər zəngin ekspozisiyası olan diyarşünaslıq muzeyi var. Muzeyin əsl fəxri təkcə qədim zamanlarda inkişaf etmiş ticarətdən xəbər verən müxtəlif dövrlərə aid qədim sikkələr deyil, həm də 2000 ildən artıq yaşı olan daş insan heykəlidir.

Yerli sakinlərin mənzillərində qalmaq olar.