Kür və Araz çaylarında aparılan növbəti monitorinqin nəticələri açıqlanıb

Ekologiya və Təbii Sərvətlər Nazirliyinin Milli Ətraf Mühitin Monitorinqi Departamentinin əməkdaşları iyunun üçüncü ongünlüyündə transsərhəd Kür və Araz çaylarının, həmçinin onların transsərhəd qollarının çirklənmə səviyyəsinin öyrənilməsi üzrə növbəti monitorinq aparıblar.

Nazirlikdən bildirilib ki, bu dövrdə Kürdə suyun sərfi iyunun 2-ci ongünlüyü ilə müqayisədə 141 m3/san artaraq 434 m3/san təşkil edib.

Monitorinqin nəticələrinə görə, Gürcüstan və Ermənistan ərazisində Kürə və onun qollarına axıdılan təmizlənməmiş məişət tullantılarının, həmçinin sənaye obyektlərinin çirkab sularının təsiri nəticəsində biogen maddələrin miqdarı yol verilən həddi (YVH) xeyli aşıb.

Suyun spesifik çirkləndiricilərindən olan fenol və mis birləşmələrinin miqdarı YVH-ni aşıb.
Belə ki, Şıxlı-2 məntəqəsində suyun əsas çirkləndiriciləri - fenol və mis birləşmələrinin səviyyəsi normanı 2 dəfə, Ağstafaçay məntəqəsində fenollar 2 dəfə, mis birləşmələri isə 3 dəfə, Ağstafaçay su anbarında fenollar normanı 3 dəfə, mis birləşmələri isə 2 dəfə aşıb.

İyunun 2-ci ongünlüyündə Araz çayında suyun sərfi 71 m3san təşkil edib.

Aparılan monitorinqlərin nəticələrinə görə Horadiz məntəqəsində mis birləşmələrinin səviyyəsi YVH-ni 2 dəfə, fenollar 3 dəfə, Şahsevən-1 məntəqəsində mis birləşmələri 3 dəfə, fenollar 2 dəfə, Bəhramtəpə məntəqəsində mis birləşmələri 3 dəfə, fenollar isə 2 dəfə aşıb.
Bəzi məntəqələrdə suda ammonium ionlarının səviyyəsi normanı bir qədər aşıb.
(4.61-6.50 m3/san)

www.apa.az