Bu günlərdə qızılbalıq körpələri Xəzərə buraxıldı

[INTRO]Hər il aprel-may aylarında Azərbaycan Təcrübi-Dəniz Balıqartırma Zavodunun (Ekologiya və Təbii Sərvətlər Nazirliyinin Su bioresurslarının təkrar istehsalı və mühafizəsi departamentinin tabeliyində olan) əməkdaşları tərəfindən Xəzər dənizinə Kür qızılbalığının körpələri buraxılır.[/INTRO]

Qızılbalıq balaları zavoda noyabr-dekabr aylarında Qəbələ və Çaykənd (Xanlar rayonu) qızılbalıq balalarının yetişdirilməsi üzrə təcrübi zavodlarından gətirilir.

Bu proses yeddi ay davam edir. Kürü ana balıqlardan alınır və süni yolla mayalandırılır. Sonra kürü dənələri xüsusi inkubasiya aparatlarında yetişdirilir. 90-100 gündən sonra balalar əmələ gəlir və bir il ərzində onlar nəhayət körpə balığa çevrilir. Əvvəlcə onlar şirin suda yetişdirilir, sonra dənizə gətirilir və böyüyüb rənglərini çəhrayıdan gümüşü-sədəfi rəngə dəyişənədək xüsusi qəfəslərdə saxlanılır. Bu, sanki balanın ikinci doğuluşudur...
Həmişə olduğu kimi, balaları Xəzər dənizi boyunca uzaq səyahətə yola salmağa xüsusi komissiya gəlmişdi. Onun tərkibinə Ekologiya və Təbii Sərvətlər Nazirliyinin Su bioresurslarının təkrar istehsalı və mühafizəsi departamentinin, Azərbaycan Balıqçılıq Elmi-Tədqiqat İnstitutunun, Su Bioresurslarının Mühafizəsi Xidmətinin, Su Nəqliyyatında Polis İdarəsinin nümayəndələri və digər məsul şəxslər daxil idi. Təbii ki, müxtəlif respublika KİV-lərinin nümayəndələri də iştirak edirdi.
Gözümüzün qarşısında xüsusi qəfəslərdən dənizə 42050 bala buraxıldı, onların hər biri orta hesabla 70-dən 100 qrama qədər çəkirdi. Zavod əməkdaşlarından öyrəndiyimə görə, onlar bu qiymətli balıq cinsinin yetişdirilməsində olduqca yüksək göstəricilərə nail olublar: itkiləri cəmi 1% təşkil edir, halbuki təbiətdə balaların yaşama qabiliyyəti cəmi 50%-dir.
Kiçik Kür qızılbalıqları xüsusi olaraq qəfəslərə yerləşdirilir, çünki onları şirin sudan dərhal dənizə buraxsalar, şok keçirəcəklər. Lakin qısa uyğunlaşma müddətindən sonra balalar yeni dəniz şəraitində yaşamağa hazır olurlar.
Kür qızılbalığı qiymətli vətəgə balıqlarından biridir. Yaxın keçmişdə bu balıq respublikamızın faunasının nadir və nəsli kəsilməkdə olan növləri siyahısında idi və Azərbaycanın Qırmızı Kitabına daxil edilmişdi. Kür qızılbalığı körpələrinin hər il buraxılması böyük fayda verir, çünki insanların qayğıkeş əlləri ilə yetişdirilən bu balıqlar vəhşi təbiətdə böyüyə, inkişaf edə və çoxala biləcəklər. Beləliklə, azərbaycanlı mütəxəssislər bu qiymətli balıq cinsinin sayının artmasına nail olurlar. Ola bilsin ki, yaxın zamanda Kür qızılbalığı təkcə Xəzərin bəzəyi deyil, həm də onun nərəkimilərlə yanaşı əsas "görməli yeri" olacaq. Nərəkimilərin sayının artırılması ilə də Azərbaycan Ekologiya və Təbii Sərvətlər Nazirliyinin Su bioresurslarının təkrar istehsalı və mühafizəsi departamentinin əməkdaşları məşğul olurlar.

Mənbə: zerkalo.az