Azərbaycanın transsərhəd çaylarının Ermənistan ərazisində çirklənməsi normanı aşır

Azərbaycanın transsərhəd çayları - Kür və Arazın - Gürcüstan və Ermənistan ərazisində çirklənməsi normanı aşır, bu barədə ölkənin Ekologiya və Təbii Sərvətlər Nazirliyindən bildiriblər.

Transsərhəd Kür və Araz çaylarının, həmçinin onların transsərhəd qollarının çirklənmə səviyyəsini öyrənmək məqsədilə may ayının birinci ongünlüyündə növbəti monitorinq aparılıb. Bu dövrdə Kür çayında su sərfi aprelin üçüncü ongünlüyü ilə müqayisədə saniyədə 315 kubmetr artaraq saniyədə 566 kubmetr təşkil edib, deyə cümə axşamı nazirliyin mətbuat xidmətindən bildiriblər.

Monitorinqin nəticələrinə görə, Ermənistan və Gürcüstanın məişət tullantılarının atılması və sənaye müəssisələrinin tullantılarının filtrasiya aparılmadan Kürə axıdılması çayda biogen maddələrin artmasına səbəb olub. Suyun tərkibində spesifik çirkləndiricilər olan fenol və mis birləşmələrinin qarışıqları yol verilən normanı xeyli aşır.

Aparılmış monitorinqin nəticələrinə görə, Ermənistanla transsərhəd olan Araz çayında su sərfi saniyədə 115 kubmetr təşkil edib. Suyun əsas çirkləndiriciləri olan mis birləşmələri Araz çayının Horadiz məntəqəsində yol verilən qarışıq normasını iki dəfə, fenollar - üç dəfə, Şahsevən I məntəqəsində mis birləşmələri və fenollar - üç dəfə, Bəhramtəpə məntəqəsində mis birləşmələri - üç dəfə, fenollar - iki dəfə aşıb.

www.trend.az