Azərbaycanda çimmək qadağan olunan çimərliklərin siyahısı açıqlanıb

2009-cu il çimərlik mövsümünün başlanması ilə əlaqədar Respublika Gigiyena və Epidemiologiya Mərkəzi (RGEM) Ekologiya və Təbii Sərvətlər Nazirliyinin Xəzərin Kompleks Ekoloji Monitorinqi İdarəsi ilə birlikdə Bakı çimərliklərinin yay mövsümünə hazırlığının monitorinqini və dəniz suyunun keyfiyyət göstəricilərinin laboratoriya tədqiqatlarını aparıb.

RGEM-dən bildiriblər ki, Mərdəkan-Şüvəlan sanitar mühafizə zolağında yerləşən çirkab sularının təmizlənməsi stansiyasının təmiri başa çatıb. Hazırda dənizə axıdılan çirkab sularının tam mexaniki və bioloji təmizlənməsi və zərərsizləşdirilməsi təmin olunub. Mərdəkan-Şüvəlan, Buzovna, Zağulba, Pirşağı, Bilgəh, Nardaran və Türkan çimərliklərindən götürülmüş dəniz suyunun laboratoriya tədqiqatlarının nəticələrinə görə, onun keyfiyyət göstəriciləri norma səviyyəsindədir.

Eyni zamanda Qaradağ rayonunun Sahil və Səbail rayonunun Şıx çimərliklərinin sanitar mühafizə zolağında yaşayış məntəqələrindən dənizə axıdılan təmizlənməmiş çirkab suları ilə dəniz suyunun intensiv çirklənməsi faktları davam edir. Novxanı çimərliyinin sanitar mühafizə zolağında Novxanı qəsəbəsi və bağ massivi tərəfindən, həmçinin Corat qəsəbəsindən dənizə çirkab sularının axıdılması çimərlik ərazisinin və dəniz suyunun çirklənməsinə səbəb olub. Burada yay mövsümünə hazırlıq qeyri-qənaətbəxş təşkil olunub, zibilin daşınması təmin edilməyib, çirkab sularından əmələ gələn gölməçələr və qamışlıq basmış bataqlıqlar antisanitar vəziyyət yaradıb.
Hövsan çimərliyinin sanitar mühafizə zolağında dəniz suyunun çirklənməsinə çirkab sularının axıdılması üçün nəzərdə tutulmuş «Hövsan» kanalı ilə dənizə sutkada 150-200 min kubmetr sənaye, təsərrüfat və məişət mənşəli çirkab sularının axıdılması səbəb olub. Bundan başqa, Hövsan aerasiya stansiyasının çirkab suları birbaşa dənizə axıdılır.

Tədqiqatlar zamanı məlum olub ki, Şıx, Sahil, Novxanı və Hövsan çimərliklərində dəniz suyunun bakterioloji çirklənmə göstəriciləri də normadan yüksəkdir. Yaranmış vəziyyətin əhalinin sağlamlığı üçün ciddi təhlükə yaratdığını, həmçinin yoluxucu xəstəliklərin yaranması və yayılması ehtimalını nəzərə alaraq, «Sanitariya-epidemioloji salamatlıq haqqında» qanun əsasında Şıx, Novxanı, Hövsan, Qaradağ rayonunun Sahil çimərliklərindən, həmçinin qeyri-qanuni çimərliklərdən istifadəyə qadağa qoyulub.

www.apa.az