"Baki" klubu Qara dənizdə keçirilən 2012 Rusiya Çempionatında

Bütün sualtı ovçulara və bizim bu xəstəliyimizə rəğbət bəsləyən insanlara salam! Hələ Gelendjik şəhərindəykən, növbəti yarışları gözləyərkən, keçən 2012 Rusiya Çempionatından təəssüratlarımı bölüşmək istərdim. Qeyd etməliyəm ki, mən əvvəllər də Rusiya yarışlarında iştirak etmişəm, amma bu səviyyədə ilk dəfədir. Bunu demək kifayətdir ki, bura, Divnomorska Rusiyanın ən güclü idmançıları toplaşmışdı - V.Dokuçayev (Rusiyanın 8 qat çempionu), A.Utkin, A.Tutuxano, A.Burtsev, P.Antonov və bir çox başqaları. Mən 11 idman ustası və 10 idman ustalığına namizəd saydım. Bu insanlarla ünsiyyət həm xoş, həm də öyrədici oldu. Şəxsən mənim üçün səfərin məqsədi hazırlıq səviyyəmi artırmaq idi və daha dərində olan balığa ov təcrübəsi qazanmaq istəyirdim.Hesabata başlamazdan əvvəl klubumuza, bu səfərə belə səmimi yanaşan bütün uşaqlara təşəkkürümü bildirmək istərdim. Belə olanda mənim qalib gəlməkdən başqa seçimim qalmırdı!!! Məsələn, Yusif, Ramin, Semyon bir dəqiqə də tərəddüd etmədən öz avadanlıqlarını təklif edib verdilər. Ramin - əla oğlandır - təzə arbaletini müvəqqəti istifadəyə verdi, onsuz bir dənə də olsun balıq tuta bilməzdim. Semyonun salı olmasaydı, GPS-ə nöqtələri yaza bilməzdim. Zakir, Yusif, Ceyhun yarışlarda iştirakla bağlı təşkilatçılarla danışıqlarda fəal iştirak etdilər. Hamınıza çox sağ olun!!!! Amma keçək mətləbə...Dənizə hər çıxış, xüsusən də belə uzaq səfər - əsl macəradır və onu bir-iki vərəq kağıza sığışdırmaq olmur. Bütün il tanış daşlarda dalıb bir dəqiqəsi də yadda qalmaya bilər, amma naməlum akvatoriyada 5 saatlıq ovun hər dalışını da yadda saxlamaq olar. YARIŞLARIN BİRİNCİ GÜNÜ güclü külək və yağış səbəbindən ləğv olundu. Az-çox təmiz su axtarışında hakimlər Djanxota getdilər, amma orada elə dalğa var idi ki, suya girmək heç cür mümkün deyildi. Sinoptiklərin vəd etdiyi hava dəyişikliyini gözləmək qalırdı. YARIŞLARIN İKİNCİ GÜNÜ. Külək doğrudan da sakitləşdi, amma dəniz cəmi 4-5 saata təmizlənə bilməzdi. Səhərdən - tibbi və texniki komissiyalardan keçmək. Start akvatoriyanın mərkəzindən saat 11.15-ə təyin olunmuşdu. Məni öz qayığına götürən yerli sualtı ovçuya sağ olsun. Qalan iştirakçılar öz qayıqlarına və icarəyə götürülmüş katerlərə dağılışdılar. Akvatoriyanın mərkəzinə çıxış hakimlərin və dəstək qrupunun fəal dəstəyi və xeyir-duası ilə müşayiət olunurdu. Çoxları başa düşürdü ki, görünmə məsafəsi çətin ki yaxşı olsun və ov 10 metr və daha dərində olacaq. Akvatoriyanın mərkəzində hakim katerinin yanında toplaşdıq, katerdə baş hakim N.Staşevski (yeri gəlmişkən, 70-80-ci illərdə Bakıda SKA-da hərbçi kimi xidmət edib), Sankt-Peterburq yığmasının məşqçisi M.Kaslanov və RPF-in prezidenti A.Arjanova var idi. Start. İdmançıları ilə bütün qayıqlar tələsik akvatoriya boyu dağılışdılar. Qeyd etməliyəm ki, start mənim məşqlərdə kəşf etdiyim, sayılan ölçüdə qorbıllar olan yerlərdən uzaq deyildi. Yerli ovçuların "etibarlı yerlərə gedək" təklifini rədd edib, məni "öz nöqtələrimdə" düşürmələrini xahiş etdim, sonradan bu düzgün qərar oldu. Suya düşəndən sonra 10 metrdə ən çoxu 1-1,5 metr görünmə məsafəsi aşkar etdim. Buya bərkidilmiş naviqatorla gedib, 5 metr xəta ilə nöqtəyə çıxdım. Təcrübə göstərdi ki, belə dalğa və görünmə ilə yazılmış nöqtənin üstündə asılıb qalmaq mümkün deyil. Əl yoxlaması ilə işləməli oldum. 12-14 metrə dalıb, mağaralar axtarışında dib boyu gedirdim. Yarım saatdan sonra daş yığınlarının birində, qaranlıq bir küncdə tüfəngə bərkidilmiş fənər pis olmayan bir qorbılın quyruğunu işıqlandırdı. Bacardığım qədər mağaranın içinə soxulub atəş açdım. Dərhal anlamadım - vurdum, yoxsa yox. Lindən dartanda qarpun yerindən tərpənmədi. Nəfəs almağa güclü ehtiyac hiss edib səthə çıxdım. Əvvəlcədən tez açılan yükü atıb, tam bərpa olunmadan dalıb buyrepi tüfəngə bərkitdim. Xoşbəxtlikdən, məni mağaradan o qədər də uzağa aparmamışdı. 5-6 dəfə dalandan sonra başa düşdüm ki, qarpun elə möhkəm ilişib ki, xüsusi alət - çıxarıcı olmadan onu çıxarmaq mümkün deyil. "Lini kəsim, yoxsa kəsməyim" sualı kəskin şəkildə qarşıya çıxdı. Bu tüfəngin Raminin olması "kəsməmək" xeyrinə əsas rol oynadı. Və qarpunu xilas edərkən artıq nə yarışları, nə də üstündə oturan balığı düşünürdüm. Yaxında hakim qayıqları olmayanda, çıxarıcı axtarışında ən yaxın idmançıların yanına üzdüm. Bütün əzab-əziyyətimi, şübhələrimi və fikirlərimi buraxıram... və deyim ki, bu yerdə 2,5 saat fasiləsiz 13,4 metr dərinliyə daldım. Nəhayət tale mənə gülümsədi və mən haradansa peyda olmuş yaşılımtıl buyu gördüm. Yaxına üzüb, heç nəyə ümid etmədən, çıxarıcı şəklində kömək istədim. Və Yuraya sağ olsun ki, hər kəsin bir-birinə rəqib olduğu yarışlara baxmayaraq, mənə pnevmat və arbalet üçün iki ucluğu olan teleskopik ev istehsalı çıxarıcı verdi. İki dalışdan sonra qarpun balıqla birlikdə əlimdə idi. Bu, Rusiya Çempionatında ikinci yeri gətirən həmin sayılan qorbıl oldu. Çox və uzun-uzadı təsvir edib danışmaq olar, ona görə də bütün təəssüratlar görüşəndə....Hamıya uğurlar!!! Görüşənədək!!!